Alveg finnst mér magnað að ég sé búin með eitt skólaár hérna í Danmörku. Og ég meikaði þetta út þótt mér hafi oft langað til að hætta því þetta ár hefur verið þurrasta ár námslega séð og í námi sem ég ætlaði aldrei að klára þannig að ég er bara stolt af mér. Ég fékk samt ekki svona frelsistilfinningu eftir prófið í dag þó svo að ég sé búin að þrá þennan dag mjög mikið. Ég er bara búin að vera chilluð en samt náttúrulega voða glöð að nú geti ég farið heim til Íslands og faðmað fjölskylduna mína og vini mína. Mamma mín er nú algjör snillingur. Ég opnaði póstinn minn upp í skóla eftir prófið og þar sé ég að mamma er búin að senda mér greeting card eins og hún gerir stundum (mér finnst það æði) og þar kom kort af berum körlum að hlaupa á strönd og undir stóð "Flýttu þér heim, þeir bíða allir eftir þér, mamma". Ég argaði úr hlátri, sérstaklega fyndið að fá svona sent frá mömmu sinni. Mér finnst mamma mín fyndin.
En ég er sem sagt að koma heim...þetta er nú alveg ótrúlegt. Ég sit hérna með allt á rúi og stúi fyrir aftan mig en ég hef ekki alveg orku til að halda áfram...orðin smá þreyttur. Ég held að ég sé búin að pakka öllu...Cecile ætlar að vekja mig klukkan 6 og þá get ég sett töskurnar út og skúrað og farið með grísling heim til sín. Svo þarf ég að fara í strætó klukkan 8 niður á lestastöð og hve ömurlegt verður það með allan farangurinn. Vonandi verður bussinn ekki troðin eins og svo oft á morgnanna. JIII, ég er að koma heim!!!!!! Hve æðislegt er það...ég er alveg brosandi að skrifa þetta... Ég fór í grill til Sveinbjörns og Guðnýjar áðan og kvaddi þau öll með faðmlögum og kossum...þetta var samt ekkert sorglegt því ég veit ég kem aftur til þeirra. Þau eru fjölskyldan mín hérna úti. Hjá þeim fæ ég almennilegan mat og huggun.
Í dag var 25 stiga hiti úti eða meira því um kvöldið var 22 gráður í skugga og það er spáð eins á morgun... maður spyr sig hvað maður er að fara heim núna en mér er alveg sama þó það sé rigning, mig vantar að komast heim til að hlaða batteríin og svo mæti ég fersk í læknisfræðina í haust...já, lífið getur verið alveg yndislegt.
Næst þegar ég blogga þá verð ég heima á Íslandi og næst þegar ég les skólabók þá verður það læknisfræðibók ;) posted by benony 1:41:00 f.h.
miðvikudagur, júní 25, 2003
úff, smá stressuð
Það er svolítið óþægileg tilfinning sem helltist yfir mig núna. Ég er nefnilega að fara í próf á morgun og er búin að vera voða svona bjartsýn fyrir það en svo kvöldið fyrir sem er einmitt núna þá fæ ég svona tilfinningu að ég kunni þetta nú ekkert of vel og á eftir að rifja svolítið mikið upp...ég vildi að ég hefði fengið þessa tilfinningu aðeins fyrr..ekki kvöldið fyrir próf.
Annars er ég að blogga núna til að afstressa mig...mér finnst oft gott að hugsa um eitthvað annað en greinilega hugsa ég ekki mikið um annað þar sem ég blaðra bara um þetta...en út í annað.
Cecile var að elda fyrir dönsku-tímana sína. Það er eitthvað partý hjá þeim á morgun og hver og einn átti að koma með mat sem er svona það sem einkennir eða það sem er mikið borðað í þeirra landi. Hún er frá Perú eins og ég hef sagt og hún vildi endilega að ég smakkaði það sem hún var að elda. Þetta var kartöflumús með majónesi og túnfisk inn á milli og svona baunadæmi á toppnum. Mér fannst þetta nú bara gott þó mér mundi nú ekki detta þetta í hug sjálfri. Ég bauð henni að elda naggrísinn auðvitað í djóki því í hennar landi borða þau naggrísi. Hún afþakkaði..sem betur fer.
Æ, ég ætla bara að hætta þessu og fara að lesa...vonandi þarf ég ekki að lesa í nótt því ég vil helst ekki vera þreytt á morgun, það er svo mikið að gera á morgun. Fyrst próf frá 9-14 og svo versla, þrífa og pakka og reyna að skila naggrísnum eitthvert...jahh maður spyr sig hvar hann endar þessi elska, kannski bara á disknum hennar Cecile.
Rétt upp hendur sem finnst sunnudagar erfiðir!!!! Þessi er búin að vera erfiður finnst mér allavega. Ég er búin að vera svo rosa þung og finnst bara allt leiðinlegt. Ég veit að það breytist strax á morgun en það koma náttúrulega svona þungir dagar hjá öllum inni á milli. Það þarf að vera smá jafnvægi því ef mér liði alltaf vel þá myndi það verða hversdagslegt. Eins og sagt er þá þarf stundum að vera leiðinlegt til þess að maður viti hvenær er skemmtilegt og geti notið þess betur.
Við Bryndis ætluðum að reikna saman smá efnafræði í fællesherberginu sem er hér. Guð minn góður....hvað var í gangi með þá aðstöðu. Ekkert ljós og allt klístrað og ógeðslegt. Þannig að við fórum heim til mín og sátum við skrifborðið hjá mér og hlustuðum á íslenskt útvarp í tölvunni minni. Það var ekkert að ganga upp hjá okkur og við fengum engin dæmi til að stemma og vorum því ekki hressar þegar við skildum....
Ég talaði við mömmu og Jóa á msn og hellti neikvæðni minni yfir þau en ég bið afsökunar því ég veit að ég verð hæstánægð á morgun aftur og dansa örugglega um skólagangana og syng mig inn í lífið. Ég fór svo í þvottahúsið og setti hreint á rúmið og hlakka nú til að skríða upp í með hreint á rúminu mínu og hlusta á jólatónlistina sem mamma sendi mér.
Var að koma frá Söndru. Við höfum alltaf svona kvikmyndakvöld heima hjá henni á sunnudagskvöldum. Það er nefnilega alltaf svo góðar myndir í sjónvarpinu á sunnudagskvöldum klukkan níu og í kvöld horfðu við á "Legend of the fall" sem er náttúrulega bara snilld. Ég er reyndar búin að sjá hana svolítið oft en hún er alltaf jafn góð og ég græt alltaf jafn mikið. Ég ákvað að gista ekki hjá henni vinkonu minni því það er bara of þægilegt rúmið hennar :) mjög erfitt að vakna á morgnanna þegar ég gisti hjá henni og þar sem ég á að mæta klukkan 8 þá hef ég ákveðið að sofa í mínu litla :) posted by benony 9:31:00 e.h.
þriðjudagur, júní 24, 2003
úff hvað ég er þreyttur
Ég er búin að vera upp í skóla frá 8 í morgun og er ossa þreyttur, samt svo einbeitingarlaus í allan dag. Við Sólveig sátum eftir spurningartíma sem var í dag og lásum og þegar komið var kvöld þá kom ein stelpa sem er í öðrum bekk inn í herbergið til okkar og sagði að einkunnirnar fyrir stærðfræðiprófið væru komnar upp á töflu. Ég hugsaði bara "nei, ég get þetta ekki...ó mæ god.." og hjartað mitt sló rosalega hratt...alveg eins og ég hefði séð sætan strák hehe..en samt leiddi hjartslátturinn upp í svona kvíðahnút í maganum sem er ekki eins skemmtileg tilfinning og fiðrildaflug sæta stráksins...sem er önnur saga. Við tókum saman dótið okkar og við tók ganga um langa ganginn...alveg út að enda þar sem stærðfræðideildin er til húsa. Ég hélt að ég myndi deyja á leiðinni og ég þaulaði fyrir munni mér "váhh, hvað þetta er óþægilegt...ég verð að fá sex...plís...sex sex sex" Maður þarf nefnilega að fá sex til að ná og það er bara það sem ég þarf fyrir námslánin...hef ekki meiri metnað fyrir þessu en það.. En nú gæti verið að þið segðuð við ykkur sjálf... "Bíddu, damn hvað hún er lengi að koma sér að þessu..náði hún eða ekki??". Já, ég veit að ég er skyggn, þið hugsuðuð þetta og eruð enn að hugsa þetta..en viljið þið vita??? Sara, fokking fékk sex í stærðfræði. Ég lét þau orð falla hérna á blogginu fyrir það próf.. "Ég vil bara fá sex, allt meira en það er tímasóun" þannig að ég eyddi engum tíma og fékk það sem ég vildi þ.e.a.s SEX! posted by benony 10:38:00 e.h.
mánudagur, júní 23, 2003
Þetta er aldeilis búið að vera norna-kvöld
Kvöldið byrjaði með þvílíkum þrumum og eldingum eins og sást í færslunni hérna á undan. Ég stóð út á stétt í skýli og horfði bara upp í himininn því hann var glóandi vegna eldinganna og þvílík læti í þrumunum..bara eins og gamlárskvöld á Íslandi svei mér þá. Loksins þegar lægði þ.e rigningin hætti og eldingarnar slokknuðu fórum við út að túninu hjá barnum því þar átti að kveikja í bálkesti. Það er nefnilega siður hérna í Danmörku að kveikja í nornum hérna eins og í gamla daga var gert. Ég, Bryndís, Gummi, Atli, Cecile og Catalina fórum saman og horfðum á danina kveikja í með sínum tilfæringum. Sem dæmi þá mættu þeir með kol til að kveikja í...ég skil ekki alveg kola-dæmið og svo þurfti mikið af bensíni vegna þess að allt var blautt. Svo var mætt með nornina sem var náttúrulega bara tuskudúkka sem einhver hafði föndrað við að sauma. Persónulega finnst mér þetta ekkert voðalega fallegur siður...ég vorkenndi norninni...ok, ég vorkenndi ekki dúkkunni en ég skil ekki afhverju verið er að halda í þennan sið að kasta nornum á bálköst. Æ, þið skiljið mig...en ég tók auðvitað þátt í þessu því ég bý núna hérna. Gaurinn sem stjórnar barnum spurði okkur hvort að við gerðum það sama á Íslandi en þá sagði Gummi honum að við hlaupum nakinn um í dögginni og honum leist ansi vel á það. Langaði held ég bara að taka það upp :)
Það byrjaði svo að rigna þegar logaði glatt í norninni og við röltum þá heim á leið. Fólk hélt nú áfram að fagna og haldið var inn á barinn með öl í hönd að sjálfsögðu. Ég fór bara í þvottahúsið og var ansi blaut þegar ég kom heim...fór því í sturtu, setti hreint á rúmið og hengdi upp þvott og ætla nú að fara að lúlla en fyrst auðvitað að knúsa Grísla góða nótt.
Mér finnst alltaf eins og ég sé í útlöndum þegar ég heyri í þrumunum úti og himininn geislar vegna eldinganna. Ég ætlaði að fara út að þvo þvott en ég eiginlega þori ekki út... ég er svo hrædd um að fá eldingu í eyrað....og svo rignir líka svo mikið. En það er samt geggjað heitt úti...svona hitaskúr örugglega. Ég er samt að spá í að hlaupa út...ég get kannski hoppað í nokkrum pollum á leiðinni og svo kemst ég í fréttirnar fyrir að hafa fengið eldingu í eyrað!!! posted by benony 7:28:00 e.h.
hæ hæ
Ég kem nú heim eftir 4 daga og ég er voða spennt. Ég hlakka nefnilega svo til að hitta fólkið mitt...það eru 6 mánuðir síðan ég sá þau síðast og það í mýflugumynd um jólin því það var svo mikið að gera. Það er óþægilegt að geta ekki almennilega hlakkað til því að ég á eftir að taka próf og svo er svo margt að gera hérna áður en ég fer..sé ekki fyrir endanum á þessu. En eftir fjóra daga þá mun ég sitja fyrst í lestinni á leiðinni til Köben og svo í flugvél á leiðinni til Íslands. Þetta verður yndislegt..
Annars liggjum við Grísi upp í rúmi og lesum...hann er slappur greyið en ég er viss um að hann sé með hægðatregðu, hann hefur nefnilega ekki kúkað lengi og vill núna ekkert borða. Ég setti hann upp í rúm hjá mér og hann tróð sér einhvernveginn í fangið á mér og hreyfist í takt við andardráttinn minn. Við höfum smá áhyggjur af því hvar litli karlinn endar þar sem ég fer heim eftir 4 daga. En það hlýtur að koma í ljós.
Ég skrapp í gær til Sveinbjörns í vöfflur og með því. Hitti þar Bínu og Sigga sem voru í heimsókn og svo Unndór karlinn sem var nýkominn frá Madrid, alltaf gaman að hitta hann!
Annars leiðist mér rosalega að lesa núna...ég er búin að vera í próflestri í rúman mánuð núna og það í júní þannig að ég er orðin voðalega leið á þessu. Spurning hvort að ég finni ekki eitthvern extra kraft sem ég geymi þarna djúpt eitthversstaðar og klári þetta, svo kem ég líka heim... :) posted by benony 1:04:00 e.h.
laugardagur, júní 21, 2003
Hávarður (gríslingur...naggrísinn) er slappur!!!
Hann er vanur að hlaupa hérna um þegar ég sleppi honum úr búrinu en núna bara liggur hann og sefur og hreyfir ekki legg nér lið. Ég sat með hann á rúminu mínu þar sem ég var að lesa og hann labbaði bara rólegur undir sængina mína og liggur bara...heyrist ekki einu sinni væl...er hann veikur eða bara þreyttur...skil þetta ekki!!! ég er með smá áhyggjur af honum blessuðum. posted by benony 7:31:00 e.h.
föstudagur, júní 20, 2003
Sigvaldi bróðir minn er þrítugur í dag
Ó mæ god, bróðir minn er orðin karl!!!!! hehehe Já, það er stórafmæli, Silli 30 ára í dag. Sá bróðir minn sem kenndi mér að prjóna og standa á skíðum, bróðir minn sem hljóp á eftir dópistanum sem lamdi mig í gettóinu breiðholti þegar ég var lítil. Já, hann Silli hugsar um sína :)
Ég veit ekki hvað Silli gerir á þessu stórafmæli sínu þar sem hann er nýlega orðinn pabbi. Ætli hann siti ekki bara og horfi á stráklinginn sinn sofa og hreyfa sig :)
Elsku Silli innilega til hamingju með afmælið. Ég kem nú eftir viku og get þá óskað þér almennilega til hamingju, ohh hvað ég hlakka til!
Í fór upp í skóla í dag því það var spurningatími fyrir prófið. Mér fannst karlarnir sem semja prófið og voru þarna að tala um þessa kafla svo góðir eitthvað að ég fékk á tilfinninguna að það gæti bara ekki verið að þeir myndu spurja eitthvað illkvitnislega á prófinu. Æ, svo eru þessir kennarar algjörir refir og þetta gat allt saman hafa verið leikaraskapur hjá þeim...en ég verð bara við öllu búin. Þetta eru heilsárskúrsar sem ég er að taka próf úr núna og því er þetta rosalega mikið lesefni eða frá öllu árinu.
Baldur var samferða okkur Bryndísi í skólann í dag því ég átti að skila beinakassanum hennar Söndru fyrir hana og Baldur þurfti að skila sínum og því fórum við samferða til að hann gæti vísað mér leiðina. Ég fékk alveg kitl í mallann þegar ég labbaði um medicin institutet...ég hef alveg komið þarna inn áður en það var öðruvísi tilifinning núna því nú veit ég að ég verð að læra þarna á næsta ári og þetta var svona tilhlökkunarkitl. Við þurftum að fara niður í betjentstuen til að skila beinunum sem er svona geymsla þar sem allt læknadótið sem maður getur fengið lánað er geymt. Þar angaði allt af formalínlykt og því eru einhverjir líkamspartar geymdir þarna líka. Ég held samt að maður fái þá ekki lánaða...þarf að skoða þá á staðnum. Þegar við vorum upp á skrifstofunni fyrir medicin þá hvíslaði Baldur að mér "Sara, afhverju biður þú konuna ekki um leslistann fyrir næsta ár". Ég hugsaði með mér að ég væri nú komin með ógeð af lestri eftir þessa 10 mánuði og rúman mánuð í próflestri þannig að vildi ekki eyðileggja hugsun mína til næsta árs með því að sjá allt sem ég þarf að lesa og kunna. Ég ætla bara að njóta sumarsins og ekki hugsa um bækur, bara um fjölskylduna og vinina og svo auðvitað vinnuna. Ég verð þá vonandi farin að hlakka til að lesa allar þessar spennandi bækur sem bíða mín eftir sumarið.. posted by benony 8:27:00 e.h.
miðvikudagur, júní 18, 2003
Ester æskuvinkona er 23 ára í dag
Við Ester vorum alveg BESTU vinkonur í 6-7 og 8 ára bekk en svo flutti hún til Vestmannaeyja. Við héldum bréfaskriftum í mörg ár og ég á alveg fullt af bréfum frá henni...gaman að lesa þau því við vorum bara litlar stelpur að breytast í unglinga og verða smá gelgjur á þeim tíma. Við höfum þó hist nokkrum sinnum á þessum tíma. Hún keppti einu sinni í Elite keppninni og ég fór að horfa á hana, mér fannst hún langflottust. Svo kom hún einu sinni og var hjá mér í sveitinni þegar ég var þar öll sumur og ég hef einni gist hjá henni í Eyjum þegar leið mín hefur verið þangað. Nú veit ég ekki alveg hvar hún er niðurkomin eða hvað hún er að gera, held að hún hafi farið í KENNÓ en ég man allavega að hún á afmæli í dag!!! Kannski ekki erfitt, 18 júní...dagurinn eftir 17 júní! :) Til hamingju Ester með afmælið..ef þú sérð þetta! posted by benony 8:28:00 e.h.
Það óma tónar frá Perú úr herberginu við hliðina!!! Reyndar fallegir tónar...hvernig ætli henni finnist þegar ég spila eitthvað íslenskt. hehe
Hausinn minn er að springa...búin að sitja inni og lesa í allan dag...fór aðeins út til að borga reikning og þvílíkur hiti. Ég hjólaði alveg á grilljón upp brekkuna og svo þegar ég kom inn þá settist ég strax niður og fór að kíkja í líffræðina og þá fann ég hvernig svitakirtlarnir mínir opnuðust...alveg fann þá opnast og svo spýttist glær vökvi er við kjósum að kalla sviti fram.
Bína systir hans pabba og maður hennar hann Siggi eru hérna en ég er ekki búin að fara hitta þau. Ætli ég fari ekki bara um helgina og hitti þau því þá er Unndór hérna líka í einn dag.
Vinir hennar Cecile eru alveg að meika það...einn er frá dominikanska lýðveldinu og kallar mig Miss Iceland. Hrópar alltaf þegar hann kemur hérna inn "MISS ICELAND, I WANT TO TALK TO MISS ICELAND". Ég ansa þessu ekki því það er engin miss Iceland hér :) En vinir hennar æða alltaf inn og hrópa eitthvað og stundum svara þeir í símann "do you want to talk to miss iceland?" :) posted by benony 7:50:00 e.h.
Cecile var að senda mér voða flott og ég ákvað bara að posta það:
Woman are like apples on trees.
The best ones are at the top of the tree.
The men don't want to reach for the good ones because they are afraid of
falling and getting hurt. Instead, they just get the rotten apples from
the ground that aren't as good, but easy.
So the apples at the top think something is wrong with them, when in reality, THEY'RE amazing. They just have to wait for the right man to come along, the one who's brave enough to climb all the way to the top of the tree.
heheh, þetta gleður okkar litlu hjörtu þar sem við erum báðar að bíða eftir að vera pikkaðar upp...
By the way, þá var Cecile að koma hérna til mín með steiktan fisk...já, það er aldeilis stjanað í kringum mig :) posted by benony 8:40:00 e.h.
hæbbs...
þetta er alveg að fara að gerast...ég kem heim eftir 10 daga...spennan magnast.
Í dag er 17 júní og mér finnst agalegt að missa af þessari hátíð heima. Mér finnst nefnilega svo afskaplega gaman að labba í bænum og hitta allt fólkið og sjá hvað ég þekki marga. Ég hef alltaf farið með mömmu og pabba þó ég sé orðin þetta stálpuð því mér hefur fundist það svo mikil hefð að fara með þeim gömlu. Enda hefur mér alltaf fundist ég vera lítil stelpa nema kannski núna síðasta árið því á því hef ég fullorðnast nokkuð mikið held ég.
Hér í Danmörku héldum við upp á 17 júní á sunnudaginn síðasta. Við vorum hérna á Rasmus Rask túninu og það voru leikir fyrir börnin og grillaðar pulsur handa mannskapnum. Ég var sett í andlitsmálun og það voru ótrúlegar myndir sem börnin sýndu mér að þau vildu vera. Ein vildi vera svona álfadís og svo var tígrisdýr vinsælt. Það sem skipti mestu var að börnin voru ánægð.
Annars er það líffræðipróf og svo bara taka til og pakka og fljúga heim. Hljómar vel ik´os?? posted by benony 2:14:00 e.h.
laugardagur, júní 14, 2003
hæ hæ
Nú eru bara 2 vikur í að ég komi heim á skerið og í tilefni af því setti ég myndir inn. Þetta eru sumarmyndir..meðal annars... Myndirnar sjáið þið hér
Annars er ég í glymjandi stuði að læra undir próf. Það hefur reyndar verið erfitt að byrja eftir stærðfræðiprófið en ég er svona nokkurnveginn að komast í gang. Samt búin að fara að djamma tvö kvöld í röð þar sem það eru 2 vikur í prófið. En nú verður allt sett á fullt.
Það átti sér stað fyndin uppákoma hér í kvöld. Meðleigjandinn minn mætti vel í því með félaga sinn og þau örguðu hérna á mig að skella mér í djammgallann og koma með þeim á barinn. Ég sat hérna í sakleysi mínu með líffræðibókina og þau voru gjörsamlega tryllt. Svo kom indverskur strákur sem býr í íbúðinni við hliðina á okkur...bara opnaði inn og hrópaði "SSSSAAAAAARRRRAAAAHHH". Gyða Sól sagði mér svo að það væru voða margir að spurja eftir mér að koma með og því yrði ég að koma. Ég fór bol og pils og arkaði með þessum nýju vinum mínum niður á bar. Geta má þess að ég var eins og risi með þessum félögum...hheheh Ég var í svona cirka klukkutíma þarna á barnum og náði að eiga dansgólfið með indverska stráknum sem by the way talar alveg eins og Abú í Simpson fjölskyldunni...mjög krúttlegur, og svo kom strákur frá afríku og ég tjúttaði við hann eitt lag. Eftir þessar rassahristingar sagði ég Atla að segja Gyðu að ég væri farin hehehe...kannski ekki besti djammfélaginn en þau eiga bara eftir að sjá mig í aktion einhverntímann seinna...
Sniðugt kvöld..hehe posted by benony 1:37:00 f.h.
mánudagur, júní 09, 2003
Það er mjög sérstakt samband á milli okkar.....
Hávarðs þó við séum bara búin að búa saman í rétt rúman mánuð. Ég er farin að tala við hann eins og eiginmann minn "þegiðu karl!!!" og "hættu þessu endemis nöldri". Já, ég ætla að tala svona við minn mann í framtíðinni....jahh, það er allavega stefnan. Ég er nú samt líka góð við Hávarð þó að hann sé alltaf að biðja um eitthvað og væla utan í mér. Hann t.d horfði á mig svo saklausum krúsídúllu augum sem sögðu "gerðu það leyfðu mér að hlaupa um.. allir hinir mega hlaupa um lausir en ég fæ aldrei" þannig að ég opnaði búrið og leyfði honum að hlaupa um lausum og þvílík hamingja hjá kappanum. Ég tók mig til og þreif búrið hans meðan hann var laus og sópaði ruslið eftir hann....einstaklega gaman fannst mér að stríða honum með því að elta hann með kústinum...æi, greyið hann var svo hræddur...hehehe
Annars er ég að fara í próf á morgun og er orðin kannski soldið steikt í hausnum...þetta er fimm tíma stærðfræðipróf þannig að þið getið ímyndað ykkur hvað dagurinn á morgun verður skemmtilegur. Ég fór í mat til Sveinbjörns og Guðnýjar í gær og þar lét ég þau orð falla að ég ætlaði sko bara að fá sex, eitthvað meira væri tímasóun. Sveinbjörn sem er orðin illa steiktur í hausnum líka eftir mikinn lestur hélt að ég væri að meina að ég ætlaði sko bara að fá kynlíf og eitthvað meira en það væri tímasóun. Þá heyrðist í Unndóri "Má það???" hahahahaha Jahh, ef þið spurjið mig þá má örugglega ekki stunda kynlíf í prófum...það gæti truflað hina....en það stendur samt hvergi að það megi ekki þannig að það er allt í lagi kannski að prófa!!!! Klikkað lið!!! En ég ætla allavega ekki að prófa það með Hávarði!!! ahahhahahahhahahahahahhaha posted by benony 9:18:00 e.h.
laugardagur, júní 07, 2003
Hún á afmæli, hún á afmæli, hún á afmæli í dag
Sólveig er nú orðin 23 ára skvísan. Það er nú erfitt fyrir skvísuna að eiga afmæli núna þar sem við erum í miðjum prófum. Já, hún Sólveig er vinkona mín hérna úti og hefur aldeilis tekið þátt í mörgum uppákomum með mér hérna úti. Við erum í prófum núna þannig að ég bið ykkur að hugsa vel til Sólveigar því það sem hana langar mest að gera núna er að fara að drekka bjór í góðra vina hópi og hver álasar hana fyrir það.
Elsku Sólveig, innilega til hamingju með afmælið....við förum og fáum okkur pizzu og kíkjum á strákana eftir prófið á þriðjudaginn!!!! posted by benony 12:18:00 f.h.
föstudagur, júní 06, 2003
21 dagur í heimferð
Ég er búin að kaupa miðann heim!!! Haldiði að það sé...ég flýg þann 27 júní með iceland express. Lendi á klakanum klukkan 14:15 á föstudegi þannig að ég get farið heim í sturtu og sjænað mig og mætt bara beint á djammið....ekki slæmt!!!! ;) Er annars eitthvað að gerast þetta kvöld sem þið vitið um...sem ég er boðin í þar að segja!???
Ég var að tala við mömmu á msn þegar ég keypti miðann á netinu og þegar ég sagði "jæja mamma þetta er komið" þá missti mamma sig alveg á lyklaborðinu. Það kom bara JEEEEEIIIIIIIIIIIIIIIIIIIIIIIIII, JJJJJJJJIIIIIIIIIIIIBBBBBBÝYY,, ÉG HLAKKA SVOOOOO TIL!!!! Ef hún hlakkar meira til en ég þá hlýtur hún sko að elska mig heitt, því ég er að farast úr spenningi. posted by benony 7:58:00 e.h.
hæ hæ
Unndór frændi minn er í heimsókn hjá Sveinbirni og Guðnýju þannig að ég skellti mér á miðvikudaginn í heimsókn til að hitta kappann. Hann var svona hress...sat með gítarinn í sófanum og æfði gripinn eins og hann er alltaf þegar ég sé hann. Það voru auðvitað fagnaðarfundir því við erum svo góð frændsystkin. Eftir að hafa spjallað saman og leikið við litlu gríslingana plataði Unndór mig út á lífið. Það var nefnilega frídagur í gær því það var víst þjóðhátíðardagur dana...fór samt framhjá mér því ég held að það hafi ekki verið nein hátíðarhöld. Við byrjuðum á því að horfa á gamla kórinn minn syngja í kirkjunni. Við settumst svona frekar aftarlega og vorum alltaf að gefa Guðný hin ýmsu merki svo hún myndi taka eftir okkur. Svo sungum við með og vorum bara hress þarna í guðshúsi. Unndór var líka að missa sig því gaurinn sem sat fyrir aftan okkur var í jóga...hvað er málið með að fíla sig inn í þetta...hehehehe
Eftir tónleikana skelltum við okkur á barina og ég var í því að finna brjóst og svona handa Unndóri.... "Unndór, brjóst fyrir aftan þig....ekki kíkja alveg strax" Svo kíkti hann alveg obvious á gelluna....sneri sig næstum úr hálslið...heheheh Við vorum svolitið mikið að skipta um bari og svo byrjaði rigning alveg a fullu og við bæði í hvítu að ofan. Ég sagði bara "YES, förum í blautbolakeppni" og við hlupum út í rigninguna. Það eina sem við græddum á rigningunni var að skyrtan hans Unndórs krumpaðist og málningin mín fór í mess...en samt ekkert alvarlegt!!!
Þetta var stuðkvöld...gaman að hitta frænda....og við löbbuðum heim til Sveinbjörns eftir djammið og ég græddi blöðru undir ilina á þessum göngutúr...já, mamma ég veit ég skal passa að það sýkist ekkert....
Málið er nefnilega það að þegar ég var 15 ára þá fékk ég hælsæri. Ég sprengdi hælsærið og hélt áfram að leika mér í sveitinni með hestunum og hundunum. Tveim dögum seinna var komin blóðeitrun alveg frá ilinni upp í nára og fóturinn var fastur og ég með 40 °hita. Ég var sett inn á barnadeildina í heila viku með pensilin í æð út af einu hælsæri. Enda var sífelldur straumur inn til mín af allskonar fólki sem spurði mig hvort að ég væri stelpan með hælsærið. sniðugt!!! posted by benony 2:32:00 e.h.
miðvikudagur, júní 04, 2003
Í dag fékk ég bréf frá læknadeildinni í pósti...
Í bréfinu eru þeir að bjóða mér pláss við deildina eins og ég hafði séð á netinu en það var bara önnur tilfinning að opna bréf og sjá þetta svona á blaði. Þetta stendur:
Syddansk Universitet har nu gennemgaaet din ansögning om optagelsen til lægevidenskab samt resultat af multiple choice testen samt samtalen. Vi kan paa den baggrund med glæde meddele dig at du tilbydes en studieplads ved Syddansk Universitet og optages som studerende i 2003.
Finnst ykkur þetta ekki æðislegt!!!?? Þar sem ég er svo dramatísk settist ég á bekk og lokaði augunum og hélt blaðinu upp að mér. Ég er búin að þrá þessi orð svo rosalega lengi....búin að vinna svo hart til að fá þessi orð í bréfi í pósti...og þau komu að lokum. posted by benony 12:21:00 f.h.
þriðjudagur, júní 03, 2003
Það er erfitt að vera svona hamingjusamur í prófum
Ég fór í próf í gær sem var eitthvað það erfiðasta sem ég hef farið í. Þegar ég fór í gegnum það hugsaði ég alltaf..."eruði ekki að djóka". Ég fékk lengri tíma því ég er útlendingur og sat ein eftir í RISAstórum leikfimisal og tvær kellur yfir mér sem gáfu mér svona óþolinmóðssvip en ég ætlaði sko að finna ljósið. Þegar ég kom út biðu stelpurnar eftir mér á hjólunum og við skelltum okkur í Friluftsbadet sem er svona útisundlaug með nóg pláss fyrir sólbað. Við lágum á bikiníunum og fórum svo í rennibrautina sem þarna var. Þegar ég var á Ítalíu með Brynju sumarið 2001 þá lenti ég í því að þegar ég lenti í lauginni eftir renniferð þá hoppuðu júllurnar út úr bikiníbrjóstahaldaranum þannig að nú ætlaði ég sko að vera búin að læra og hélt fyrir brjóstin alla leiðina niður en þegar ég svo splassaðist í laugina...í alvöru ég tók flug, þá var vatnið svo kalt að ég tók andköf og öskraði og hendurnar fálmuðust eitthvað í allar áttir þannig að maður er ansi asnalegur!!!! En þau hoppuðu ekki út fyrir sem betur fer. Héldust kyrr...börnin hefðu fengið sjokk.
Efir yndislegan dag í sólinni þá grilluðum við heima hjá mér....sátum úti á bekk og borðuðum grillmat. Við skemmtum okkur voða vel og svo kom Baldur og grillaði með okkur. Þegar ég fer í póstkassann þá hef ég alltaf séð nafn sem er A. Sævarsson á póstkassa fyrir íbúðina sem er fyrir ofan mig...og ég var alltaf að velta fyrir mér hver þetta væri og afhverju ég hefði aldrei hitt þennan íslending. Hann kom til okkar í grillið, heitir Atli og er hress. posted by benony 3:01:00 e.h.
Rauðhærði útlendingurinn 
föstudagur, júní 27, 2003
